Charter Document - 02220188

Je Hugues de Planteigne de Salins chevaliers fais savoir à ces qui verront ces lettres que cum je tenisse en fié dou noble baron Jeham conte de Bourgoigne et signour de Salins ceu que je ay à Champaigney et quatre quartiers de chaudiere em la muire de son pois de Salins desquex quatre quartiers je li hai vendu l'un et li uns quartiers et demy an ai je vendu c'est assavoir à mons Colin dit Petit Cusin de Salins chevalier dim[i]e quartier et à Hugue fiz Danviet çay en arriers chastelain de Bracon dimie quartier et Phelippe de Salins mon cousin chanoinne de Saint Anathoile de Salins dimie quartier et ledit quartier et demy qui vendu ai audit Colin audit Hugue et audit Phelippe m'a fait d'aluef lidit cuens Et je en eschange dou fié doudit quartier et demie hai repris en fié doudit conte par le loux et par le consentemant de Marguerite ma fome ma maison devant Saint Morise de Salins le courtil et tout le vergier environ et ma vigne de la Platiere derriere Saint Pere assisse entre la vigne mons Guillaume Le Vert et Ferruyse Et par ansi tieng encour ligemant de luy en fié ceu que je hai à Champaignye et li un quartier et demie de chaudiere en la muire de son puis de Salins et ladite maison courtil vergier et vigne En tesmoignaige de ceste chose li chapitres de Saint Morise de Salins hai mis son seel pendant en ces lettres à la proiere et à la requeste de moy et de madite fame Ce fust fait le jour de feste saint Urbain l'an Nostre Signour qui corroit par mil et deux cenz et sexante et sept