Charter Document - 02220187

Je Willaumes sires d'Arguel chevaliers fais savoir à touz que je suis hons à noble home Jeham de Chalon signour d'Arlay sauve la feauté à mes signours lesquex je avoie devant et tien de luy en fié et en chasemant permaignablemant sexante livres de rante à estevenans em la salnerie de Salins qui est es hoirs dou noble baron Jeham conte de Bourgoigne et signour de Salins çay en arriers et ay promis et promet audit Jeham par mon soiremant corporelmant donné sus sains ewangiles recepter ledit Jeham et celuy de ses hoirs à cui lidiz fiez vendroit à grant force et à petite en ma maison d'Arguel contre toutes genz sauz que contre le noble baron Othon conte de Bourgoigne palazin et signour de Salins et Jacot signour d'Arguel mon nevour Et est assavoir que lidiz fiez de sexante livres de rente ne doit ne ne puet partir de celuy de mes hoirs qui sires sara de madite maison d'Arguel mais le doit tenir en son dommaine ou on le tendra en fié de luy Et ces covenances promet je tenir audit Jeham et à ses hoirs par mon soiremant derechief doné sus saint ewangile et de ceu oblige moi et mes hoirs à tenir et garder fermemant et à garantir contre toutes genz ledit fiez En tesmoignaige de laquel chose j'ay requis honorauble persone l'official de Besançon que il mete le seel de ladite court en ces presantes lettres ensamble [le] mien seaul Faites et données l'an Nostre Signour corrant par mil CC octante et sept ou mois de janvier