Charter Document - 02220185

Je Hugues sires de Neblens fais savoir à touz que je ay receu à homme lige Girar fiz çay en arriers mons Perrun d'Arguel de son partaige doudit chastiaul d'Arguel que ses peres devantdiz tenoit de moy et doin audit Girar en accressemant doudit fié don je l'ay receu à homme tout ce que ses peres devantdiz tenoit de moy en fié ligemant à Arguel et autre part et tout ceu tient il de moy ligemant assi com ses peres l'am tenoit et weil et comant que tuit cilz qui sont parcenier et qui proignent partie oudit fié que lidiz Pierres peres doudit Girart tenoit de moy ligemant [à] Arguel et autre part [entrent] en accressemant en l'omaige doudit Girart et se il ne voloient entrer je li promet en bone foy come à mon home lige que je li an saroie aidanz au mien propre tamque il hi fussent antrez et qu'il les an ahut receus en homes liges Et cest don devantdit je li promet et coventois en bone foy come à nostre home lige à garantir et l'ay fait par le consentemant par le loux et par l'outroiemant de Marguerite ma fome et de Estevenet mon fil En tesmoignaige de laquel chose j'ay seelé ces presantes lettres de mon seal et je Marguerite devantdite dame de Neblens les ay seelées dou mien seaul et je Estevenet devantdiz lour fiz les ay seelées dou mien seel Et je Esteinnes chevaliers sires de Valgrenant à la priere et à la requeste des devantdiz le noble baron Hugue signour de Neblens et Marguerite sa fome et Estevenet lour fiz et Girart d'Arguel ay seelé ces lettres de mon seal en tesmoignaige de verté Ce fut fait l'an de grace qui corroit par mil doux cenz sexante et doux au mois de octambre