Charter Document - 02220184
| Charter Number: | 02220184 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1289 |
| Date type: | Internal, A.D. |
| Resource Link(s): |
Patrimoine numérisé de Besançon - MS Droz 21 - Tome 1 (p.382) |
Charter:
Je Frery de Morpré chevaliers fais savoir à touz que je et my hoirs sumes tenuz à toutjoursmais havoir et tenir un cheval de la valour de quarante livres d'estevenans ou de tournois pour servir en ses besoignes mon amé signour monsignour Jeham de Chalon signour d'Allay et ses hoirs en tel meniere que se ensi estoit que je ou li mien perdissiens ledit chevaul es besoignes monsignour ou à celes à ses hoirs il doivent amander à moy ou es miens ledit chevaul et si ensi estoit que en autre meniere fut perduz je ou my hoir sumes tenuz d'autre acheter de la valour de quarante livres et à ce tenir et garder je oblige moy et mes hoirs et tout mes biens moubles et non moubles Et pour ces choses dessusdites tenir et garder permaignablemant lidiz messires Jehans m'a donné cent livres d'estevenans et un cheval de la valour de quarante livres laquel somme d'argent et lequel chevaul pour les condictions dessusdites et pour les robes j'ay eu et receu doudit mons Jeham et m'an tien pour bien paiez Et ces choses je promet tenir et garder pour moy et pour les miens em bone foy et pour ce que je n'avoie seel j'ay requis et fait metre en ces presantes lettres le seaul dou chapitre de Saint Anathoile de Salins Faites et donné l'an Nostre Signour corrant par mil CC octante et IX ou mois de septembre