Charter Document - 02220183

Je Guillemin dit Forestier d'Arlay fais savoir à touz que come mes très chiers bien amez et redoutés sires messires Jehans de Chalon sires d'Arlay m'ait receu et pris en son homme lige de main et de bouche en la meniere et en la forme que il ai acostumé de recevoir ses gentishomes je recognois que j'ay repris de mondit bien amé et redoté signour et tiens en fié ligemant de luy devant touz autres signours tout quanque je ay ne puis avoir dois le temps passey tantque au jour de la confection de ces lettres soit en champs em prez em bois en vignes en chasaux et toutes autres choses comant qu'ales soient nommées ne appelées et quantque je porray conquerir ou temps à venir sauz ceu qui est ou sara d'autrui fié Et est assavoir que de tout droit raisons actions quereles et demandes que mes très chiers et redoutés sires ait ne puisse avoir contre moy de tout le temps passey tantque au jour de la confection de ces lettres de quelque chose que ceu soit il m'a quitté et mes hoirs et quitte dou tout en tout sans jemas [riens] demander [à] moy ne es miens pour luy ne pour autruy et wet et outroie à moy Guillemin que je et mes hoirs tignons et puissons tenir toutes nostres maisons et nostre chasaux franches en som bourc d'Arlay de toises et de toutes autres costumes en accressance dou fié que nous tenons et tendrons de luy Et ces covenances toutes ci dessus escriptes je lidiz Guillemin promet loialmant et em bone foy pour moy et pour mes hoirs garder et tenir fermemant pour moy et pour mes hoirs à mon devantdit bien amé et redoté signour et à ses hoirs toutjour mais sanz jemas aler encontre par moy ne par autruy En tesmoignaige de laquel chose je Guillemin ay requis et fait metre en ces lettres le seaul frere Symon de Goncens humile abbé par la grace Deu de Baume emsamble le seaul mons Pierre Le Bois curé d'Allay Faites et données l'an de grace corrant par mil CCC et doux ou mois de janvier