Charter Document - 02220182

Je Jehans sires de Viremont escuiers fais savoir à touz que je suis hons et antrez en l'omaige et confessois par ces lettres moy estre home de noble baron monsignour Jeham de Chalon signour d'Arlay mon bien amey signour sauve tant seulemant la feauté de noble baron Jeham de Chalon conte d'Aceurre et signour de Rochefort et de religiouse persone et honeste monsignour l'abbé de Saint Oyant de Jou mes premiers signours Et cest homaige j'ay fait à mon devantdit signour monsignour Jeham de Chalon signour d'Arlay pour le pris de cent livres de petit tornois lesquex je ay eues et receues doudit mons Jeham de Chalon et bien m'an suis tenuz por paiez et pour ce qu'il m'a retenu de ses robes escuiers et chevaliers quant Dieux me donra venir à l'onour de chevalerie à toutjoursmais assi comm'il a escotumé de doner les robes communaux à ses maignies Et promet audit mons Jeham par mon soiremant donné sus saint ewangile par stipulation sollempne que je ledit mons Jeham de Chalon ayderay moy et I autre encontre toutes genz sauz ce que encontre mes premiers signours devant noumez et vindray à ses mandemant moy et I autre compaignon à armes toutes les foiz que je an saray requis par luy ou par ses lettres Et li promet de luy recepter en mon chastel de Viremont contre toutes genz saux que encontre mes signours devant[diz] excepté et ceste ayde je li doy faire à ses despan Et se ensi estoit que je perdisse chevaul ou herneis en son servise ou receusse aucun domaige il les me doit restorer au regart de chevaliers Et pour ce que ceu soit ferme chose et estauble j'ay mis mon seel en ces presantes lettres et prié et requis noble homme monsignour Girart signour d'Arguel qui mete son seel en ces presantes lettres Faites et données le jeudi devant la saint George l'an mil CC nonante et huit ou mois d'avril