Charter Document - 02220180

Je Merguerite dame de Belevevre fais savoir à touz que je ay pris et tien en fié et en chasemant dou noble baron monsignour Jeham de Chalon signour d'Arlay Charencey sus Loue et l'une maison fort et l'autre c'est assavoir ceu que messires Vachiers sires de Andelot tient de moy esdites doues maisons et es appartenances soit en fiez ou en rerefiez en justices en hommes en terres arables et non arables en prez em bois em champs en riveres et en toutes autres choses quel qu'eles soient et comant qu'eles soient appelées pour le pris de quatre vinz livres d'estevenans que je ay receu doudit monsignour en bons deniers nombrez Et ces choses dessusdites ensi con elles sont dessus devisées je promet tenir et garder fermemant pour moy et pour les miens par mon soiremant doné sus saint ewangiles et non venir encontre par moi ne par autrui ne consentir venir ou temps çay en avant et renoncois Et pour que ceu soit ferme chose et estauble je ay proié et requis honorauble baron et saige l'official de la court de Besançon que il mete le seel de ladite court de Besançon en ces presantes lettres en tesmoignaige de verté Faites et données II nonas februarii l'an Nostre Signour mil doux cenz IIIIxx et cinc