Charter Document - 02220178

Je Phelippes de Vianne sires de Paigney fais savoir à touz ces qui verront et orront ces presantes lettres que je ay repris et tien en fié et en chasemant dou noble baron Jeham dit de Chalon signour d'Arlay mon chastel de Pymont les appendisses et les appartenances doudit chastel et quamque j'ay et doy avoir tien et doy tenir à Laon le Saunier et es appartenances et es appendisses de ladite vile en quelque choses que ceu soient em hommes em prez em champs en vignes em bois en muire en signories en bans en justises et en toutes autres choses que j'ay et puis et doi avoir en ladite vile et es appendises et es appartenances en demeneure en fiez et en rerefiez en toutes autres rentes et valours quel qu'eles soient et quamque m'i doit et puet escheoir ou avenir en toutes menieres saus le droit de la menoie se faite hi estoit que je retien Et ai repris et tien encour doudit Jeham le fié que de moy tient Estevenins sires de Ruffey c'est assavoir Ruffey Lesye Crilley et toutes les rentes et les autres choses que lidiz Estevenins tient de moy et doit tenir quelque part qu'eles soient et quelque chose que ceu soient soit en fiez ou en rerefiez ou en demenures Et ay repris encour doudit Jeham et tien en fié le fié de Mugnet et la garde de Balerne et toutes les choses que audit fié de Mugnet apartienent et appandent en demenures en fiez et en rerefiez et en toutes autres choses Et ay repris et tien encour en fié doudit Jeham le fié de Belregart et de Virechastel et le fié de Desnens et quamque apartient es fiez desdiz lieus que l'on tient de moy soit en demenures en fiez et en rerefiez Et de toutes les choses dessusdites suis je antrez en son homaige sauve la feauté le duc et le conte de Bourgoigne mes signours Et promet loialmant et en bone foy audit Jeham garantir et mantenir les devantdites choses et les devantdiz fiez ensi com droiz et raisons l'aportera Et en recompensation de ces choses et de ces fiez lidiz Jehans m'a donné mil et cinc cenz livres de bons estevenens lesquex je ai eues et receues de luy en bons deniers nombrez desquex je me tien pour bien paiez Et me doy contenir vers ledit Jeham com vers mon signour et il vers moy com vers son home sauz ce qu'il n'est tenus de moy aidier contre le noble baron Jeham de Chalon conte d'Aceurre se il ne venoit dou grey audit Jeham de Chalon signour d'Arlay ne je ne suis ausi tenus d'aidier audit Jeham de Chalon signour d'Arlay contre le noble baron Henri de Paigney signour de Sainte Croiz mon oncle se de mon gré ne venoit Et promet encour toutes ces convenances ensi come eles sont dessus devisées tenir et garder fermemant toutjour mais et que je ne vendray encontre ne faray venir par autruy taisiblemant ne expressemant et renunçois En tesmoignaige de laquel chose je lidiz Phelippes ay mis mon seel pendant en ces presantes lettres faites et données en l'an de l'incarnation Nostre Signour qui corroit par mil douz cenz octante et trois le jour de la feste saint Martin de yver