Charter Document - 02220176

Je Wauchiers sires de Commercis fais savoir à touz ces qui verront ces lettres que je suis antrez en l'omaige Jeham conte de Bourgoigne et signour de Salins et tien de lui Chastelvilain et Monrivel Charbonel et Le Nam en tel meniere que je Chastelvilain et Monrivel tien de luy rendable et jurauble contre toutes genz et les autres doux tien de luy de fié lige et suis ses hons liges en Bourgoigne si comme Sonne la depart par devers Besançon contre toutes genz et de l'autre part assi je suis ses hons liges contre toutes genz sauve la feauté monsignour l'avesque de Mez et monsignor le conte de Bart [et] monsignour l'avesque de Toul Et quicumques de mes hoirs tenra après moy ma terre de Bourgoigne il tenra dou devantdit conte de Bourgoigne et signour de Salins les quatre devantdit chastiaux et sara ses hons liges en Bourgoigne contre toutes genz en tel meniere come je suis Et pour ce que ceste chose soit plus ferme et covenauble je devantdit Wachiers sires de Commercey ay seelées ces lettres de mon seel qui furent faites en l'an de l'incarnation Nostre Signour mil CC quarante doux anz ou mois de may