Charter Document - 02220175

Sachent tuit cil qui verront ces lettres que Emmarris sires de Jou et Henri ses filz chevaliers sont antrez en l'omaige lige à la noble dame Lore contesse de Bourgoigne et dame de Salins par la velonté et par le comandemant dou noble baron Jeham conte de Bourgoigne et signour de Salins sauve la feauté doudit conte à sa vie Et est assavoir que après le decès audit Amarri lidiz Henri ses fiz doit remanoir et estre hons liges à ladite Lore de tel partie come à luy escharra de l'iritaige son pere qui muet dou fié doudit conte et de ladite Lore et de ses hoirs lidiz Henri et sui hoir doivent tenir ladite partie que li escharra de son pere de ce que dou fié audit conte saroit En tesmoignaige de laquel chose lidiz Amarriz sires de Jou et Wauchiers abbes de Goile à la priere doudit Amarriz et Henri ont mis lour seaux pendans en ces lettres Ceu fut fait l'andemain de feste saint George l'an Nostre Signour qui corroit par mil CC sexante et doux