Charter Document - 02220173

Nous Jehans cuens de Bourgoigne et sires de Salins faisons savoir à touz ces qui verront ces lettres que messires Lambers de Goncens et messires Huedes d'Esterno et messires Guillaumes de Saint Jeham chevaliers par nostre velonté et par nostre comandemant sont antrez en l'omaige la contesse Lore nostre fame de tel fié com chascun tient de nous en tel meniere que nous prometons loialmant et à bone foy que nous à ladite Lore nostre fame et à ses hoirs que de nous ai et aura donons lesdiz homaiges en sa partie droite et loial que fait li avons et farons encour sauve nostre feauté à nostre vie et en tel meniere que nous ne hoir que nous aions autre que li suens n'i puissent riens reclamer esdiz homaiges si ensi n'estoit que ladite Lore que Dieux ne weille morust sanz hoir que de nous eust En tesmoignaige de laquel chose à nostre priere et à nostre requeste Humbers nostre sires religious abbes de Saint Oyant de Jou a mis son seel pendant en ces presantes lettres ensamble le nostre Ce fut fait l'an de l'incarnation Nostre Signour qui corroit par mil CC et sexante ou mois de janvier