Charter Document - 02220172

Nous Jehans cuens de Bourgoigne et sire de Salins faisons savoir à touz ces qui verront ces presantes lettres que nous avons donné et outtroié es anfans que nous avons et aurons de la contesse Lore nostre fame en lour loial partie que doné lour avons de nous biens et de nous honours après nous le fié que de nous tient messires Guillaume diz Bretons de Salins chevaliers chastelains à Chalemont et par nostre comandemant est antrez lidiz Guillaumes en l'omaige à ladite contesse Lore nostre fame Et est assavoir que nous volons et comandons audit Guillaume que se de nous defailloit que il rendist et baillast le chastel de Chalemont à ladite Lore ou à son comandement certain se ensi estoit que lidiz Guillaumes fut adonc chastelain de Chalemont En tesmoignaige de laquel chose nous avons mis notre seel pendant en ces lettres Ce fut fait le mecredi après feste saint Pierre et saint Poul l'an de l'incarnation Nostre Signour qui corroit par mil doux cenz sexante et trois