Charter Document - 02220171

Nous Jehans cuens de Bourgoigne et sires de Salins faisons savoir à touz ces qui verront ces presantes lettres que messire Symons de Jonvile sires de Mernay nostre nies par nostre velonté et nostre comandemant est antrez en l'omaige la contesse Lore nostre fame ligemant en tel meniere que nous prometons loialmant et à bone foy que nous à ladite Lore nostre fame et à ses hoirs que de nous a et aura donons ledit homaige en lour partie droite et loial que fait lour avons et encour farons sauve nostre feauté à nostre vie et que nous ne hoir que nous aiens autre que li suens n'i puissent riens reclamer audit homaige se ensi n'estoit que ladite Lore que Dieux ne weille morut sanz hoir que de nous eust En tesmoignaige de laquel chose à nostre priere et à nostre requeste Humbers nostre sires religious abbes de Saint Oyant de Jou a mis son seel pendant en ces presantes lettres ensamble le nostre Ce fut fait l'an de l'incarnation Nostre Signour qui corroit par mil CC et sexante ou mois de janvier