Charter Document - 02220170

Nous Jehans cuens de Bourgoigne et sires de Salins faisons savoir à touz ces qui verront ces lettres que Emarriz sires de Jou et Henri ses fiz chevaliers nostre homme sunt antrez par nostre velonté et par nostre comandemant en l'omaige Lore contesse de Bourgoigne et dame de Salins nostre fame sauve la feauté à nostre vie Et est assavoir que lidiz Emarriz doit tenir après nostre decès de ladite Lore et de ses hoirs que de nous a et aura le fié que de nous tient et après lidiz Henriz doit estre et remanoir hons liges à ladite Lore et à ses hoirs que de nous a et aura après le decès doudit Emari son pere de tel partie com il li escharra de l'iritaige son pere qui muet de nostre fié Et est assavoir que nous ne hoir que nous aions autre que cil que nous avons et aurons de ladite Lore ne puet riens reclamer asdiz homaiges se ensi n'estoit que Dieux ne weille que ladite Lore morut sanz hoir que de nos eust En tesmoignaige de laquel chose à nostre priere et à nostre requeste Wachiers religious et honestes abbes de Goile a mis son seel pendant en ces presantes lettres ensamble le nostre seel Ce fut fait l'an de l'incarnation Nostre Signour qui corroit par mil CC sexante et douze l'andemain de feste saint George ou mois d'avril Item les paroilles lettres de mot à mot et seelées de tels seels con dessus