Charter Document - 02220169

Nous Jehans cuens de Bourgoigne et sires de Salins faisons savoir à touz ces qui verront ces presantes lettres que messires Wauchiers sires d'Andelost par nostre velonté et par nostre comandemant est entrez en l'omaige la contesse Lore nostre fame ligemant sauve la feauté es signours de Mugnet mons Wauchier de Commercis et les fiez de part le mariaige de sa fame et tient de nous la forteresce de Myons et quantque il ai à Myon à Esterno et à Deserviler en hommes en fiez et en toutes autres choses es territoires desdiz leus en tel meniere que nous prometons loialmant et à bone foy que nous à ladite Lore nostre fame et à ses hoirs que de nous ha et aura donons ledit homaige en lour partie droite et loial que fait lour avons et encour ferons sauve nostre feauté à nostre vie et en tel meniere que nous ne hoir que nous aions autre que li suens n'i puissent riens reclamer audit homaige se ensi n'estoit que ladite Lore que Deux ne weille morust sanz hoir que de nous eust En tesmoignaige de laquel chose à nostre priere et à nostre requeste Humbers nostre sires religious abbes de Saint Oiant de Jou a mis son seel pendant en ces presantes lettres ensamble le nostre seel Ce fut fait l'an de l'incarnation Nostre Signour qui corroit per mil CC et sexante ou mois [le nom du mois a été omis]