Charter Document - 02220168

Nous Jehans cuens de Bourgoigne et sires de Salins faisons savoir à touz ces qui verront ces presantes lettres que messires Richars de Mombeliart sires de Ceys par nostre velonté et par nostre commandemant est antrez en l'omaige la contesse Lore nostre fame de tel fié com de nous tient en tel meniere que nous prometons loialmant et en bone foy que nous à ladite Lore nostre fame et à ses hoirs que de nous ha et aura donons ledit homaige en lor partie droite et loiaul que fait lour avons et encour ferons sauve nostre feauté à nostre vie en tel meniere que nous ne hoir que nous aions autre que li suens n'i poions riens reclamer audit homaige si ensi n'estoit que Dieux ne weille que ladite Lore morist senz hoir que de nous eust En tesmoignaige de laquel chose à nostre priere et à nostre requeste Humbers nostre sire religious abbes de Saint Oiant de Jou a mis son seel pendant en ces presantes lettres ensamble le nostre seel Ce fut fait l'an de l'incarnation Nostre Signour qui corroit per mil deu cenz et sexante ou mois de janvier