Charter Document - 02220167

Nous Jehans cuens de Bourgoigne et sires de Salins faisons savoir à touz ces qui verront ces presantes lettres que nous avons doné et outroié as anfanz que nous avons et aurons de la contesse Lore nostre fame en lour partie loial que doné lour avons de noz bienz et de nouz honours après nous le fié que de nous tient messires Richars sires d'Abbanz Et est assavoir que nous volons et comandons audit Richart que il entroit en l'omaige la contesse Lore nostre fame en non de nous anfans que de li avons sitost con lidiz Richars an sara requis de ladite Lore En tesmoignaige de laquel chose à nostre priere et à nostre requeste li religiouse dame et honeste Merguerite abbasse de Chastel Chalon a mis son seel pendant en ces lettres ensamble le nostre seel Ce fut fait l'an de l'incarnation Nostre Signour qui corroit par mil doux cenz sexante et trois au mois de septembre