Charter Document - 02220166

Nous Jehans cuens de Bourgoigne et sires de Salins faisons savoir à touz ces qui verront ces presantes lettres que Hugues sires de Husies par nostre velonté et par nostre comandemant est entrez en l'omaige la contesse Lore nostre fame de tel fié con il tient de nous en tel meniere que nous prometons loialmant et à bone foy que nous à ladite Lore nostre fame et à ses hoirs que de nous ha et aura donons ledit homaige en lour partie droite et loiaul que faite lour avons et encour farons sauve nostre feauté à nostre vie en tel meniere que nous ne hoirs que nous aions autre que li suens n'i puissent riens reclamer audit homaige si ensi n'estoit que Dieux ne weille que ladite Lore morust sanz hoir que de nous eust En tesmoignaige de laquel chose à nostre priere et à nostre requeste Humbers nostre sires religious abbes de Saint Oiant de Jou a mis son seel pendant en ces presantes lettres ensamble le nostre Ce fut fait l'an de l'incarnation Nostre Signour qui courroit par mil douz cenz et sexante ou mois de janvier