Charter Document - 02220165

Nous Jehans cuens de Bourgoigne et sires de Salins faisons savoir à touz ces qui verront ces presantes lettres que messires Wauchier de Commercix sires de Chastelvilain et Henri de Commercis ses freres sires de Momrivel par nostre velonté et nostre comandemant sont antrez en l'omaige la contesse Lore nostre fame ligemant en tel maniere que nous prometons loialmant et em bone foy que nous à ladite Lore nostre fame et à ses hoirs donons lesdiz homaiges en lour partie droite et loial que fait lour avons et encour ferons sauve nostre feauté à nostre vie et en tel maniere que nous ne hoirs que nous aions autres que li suens n'i puissent riens reclamer esdiz homaiges si ensi n'estoit que ladite Lore que Dieux ne weille morist sanz hoir que de nous eust En tesmoint de laquel chose à nostre priere et à nostre requeste Humbers nostres sires abbes de Saint Oiant de Jou a mis son seel pendant en ces presantes lettres ensamble le nostre Ce fut fait l'an de l'incarnation Nostre Signour qui corroit per mil doux cenz et sexante ou mois de janvier