Charter Document - 02220164

Nous Phelippes de Vianne sires de Paigney faisons savoir à touz ces qui verront et orront ces presantes lattres que nous pensen[s] et considerans les biensfait les bontés les servises et les obseques à nous et à noz faiz soventes foiz de noble baron nostre très chier et bien amé signour Jeham de Chalon signour d'Arlay et que lidiz Jehans fit à nous et es noz chascum jour continuelmant et especialmant pour mil livres d'estevenans lesquex nous avons eues et receues doudit Jeham en bons deniers nombrez suimes antrez en l'omaige audit Jeham nostre signour et avons repris en façant l'omaige doudit Jeham en fié les choses cy après ensuigant escriptes c'est assavoir le fié de Belevevre et quanque Merguerite dame de Balevevre tient de nous en fié item le fié de Bosjuant et quanque messires Jeham sires de Bosjuant tient de nous en fié item le fié de Flacey et quanque Huet de Belvoir sires de Flacey tient de nous en fié item le fié que messires Wauchier de Commercis sires de Chastelvilain tient de nous c'est assavoir Cleresvaux en montaigne et toutes les autres choses qui appartienent et sont doudit fié de Cleresvaux et encour avec ce toutes les autres choses qui appartienent et sont des devantdiz fiez de Cleresvaux et de Belevevre de Bosjuant et de Flacey en quelque chose que ceu soit soit en fiez soit en rerefiez soit em bourz marchiez chastiaus viles homaiges hommes maisons tenemant mas chasauls terres araubles et non arables prez vignes bois riveres pescheries molins fours tailles signories justices grans et petites courvées censes costumes et toutes autres droitures et servises que appendent appartienent ou appartenir doivent es fiez dessusdiz ou à chascum de lour en quelque meniere que ceu soit de droit de fait de costume ou d'estaublissemant sauve la feauté le conte de Bourgoigne et le duc de Bourgoigne Et toutes ces choses dessusdites reprises en fié doudit Jeham ensi con il est dessus diz prometons nous pour nous et pour nous hoirs par nostre foy donée appasier garandir et deffendre audit Jehan et es suens permaignablemant contre toutes genz et en touz lieus et que encontre les choses contenues en ceste lettres ou aucunes de yceles dois or en avant ne vanrons ne consentirons que autre y viegne mais les garderons et tenrons fermemant et comandons qu'eles soient tenues et gardées de noz hoirs et de noz successours en ceste partie Et renonçons En tesmoint de laquele chose nous avons mis nostre seel pendant en ces presantes lettres et avons proié et requis honorauble baron et saige l'official de la court de Besançon que il mete le seel de ladite court de Besançon en ces presantes lettres auvec le nostre en tesmoignaige de verité Et nous officiaus de la court de Besançon dessusdiz à la priere et à la requeste doudit Phelippe à la relation de Guillaume De Vaux clerc juré de nostre court et nostre comandemant especiaul pour ce envoié de part nous et auquel nous avons donné nostre puissance et nostre comandemant quant à ce et commis noz voies et à cui nous avons pleniere foy en ceste partie liquex Phelippes est entrez en la presance doudit nostre comandemant en l'omaige doudit Jeham et ay pris de luy en façant cel homaige les choses dessus devisées et qui ay promis pour luy et pour les suens par sollempne stipulation et par la foy donnée en la main doudit nostre comandemant toutes les choses dessusdites tenir et garder audit Jeham et es suens permaignablemant et qui encour ai promis que il procurera et fara que noble dame Jehanne de Geneve sa fame louera toutes les choses dessusdites et se hi consentira dessus cest lous et cest consentemant en fara et louera et comandera à faire lettres bones et avenans seelées dou seel de la dite court de Besançon et qui encour ai coneu par devant ledit nostre comandemant en droit toutes les choses dessusdites estre veraies et qu'il s'est submis et submet quant à ce à la jurisdiction de nostredite court de Besançon où que il soit ne face sa maison que nous puissons controindre luy et ses hoirs par sentence d'escumeniemant à tenir et à garder toutes les choses dessusdites par ensi com alles sont dessus devisées par ensi com lidiz nostre comandemanz nous ai raporté par vive voiz avons mis le seel de ladite court de Besançon en ces presantes lettres auvec le seal doudit Phelippe en tesmoignaige de verté qui furent faites et domnées le vanredi devant la saint Andrey l'an Nostre Signour corrant per mil CCIIIxx et douze