Charter Document - 02220163

Je Jehans de Vianne sires de Mirebel fais savoir à touz que je suis devenuz hons feaubles de main et de bouche et entrez en l'omaige à noble home monsignour Jeham de Chalon signor d'Arlay et li ay promis et promet feauté tenir et garder come à mon signour et li ay encour promis et promet à recepter toutjoursmais luy et les suens à grant force et à petite en mes chastiaus de Mirebel et de Chastoillon en montaigne en toutes les fourteresces que hi sunt granz et petites et qui porroient estre faites à toutes forces de genz granz et petites contre toutes genz come mon signour fuers que contre monsignour Phelippe de Vianne signour de Paigney mon signor et mon frere Robert noble baron duc de Bourgoigne Othe noble baron conte de Bourgoigne Et cest receptemant et cest droit de recept j'ay pris et repren doudit Jeham de Chalon pour luy et pour ses hoirs à toutjorsmais pour moy et pour mes hoirs cui je oblige à ce faire tenir et garder en fié et en chasemant et ceu ay je fait par l'outroy et par la volonté doudit mons Phelippe de Vianne mon frere de cui je tien en fié lesdites fou[r]teresces par cui comandemant especialmant je l'ay fait et fais Et toutes ces choses ay je promis tenir et garder par mon soiremant corporelmant doné sus saint evangile et renunçois Et weil et outroy que se encontre venoie je ne mi hoirs li signour de Mirebel et de Chastoillon quelque il soient que li officiaus de Besançon qui à ce temps saroit me puet controindre moi et mes hoirs quelque part que nous fussions per sentence d'excumeniemant en nostres personnes et per entredit de nostre terre à tenir les covenances devantdites et some[s] moi et mes hoirs à la jurisdiction de l'official de Besançon quelque part que nous fuissons Et se je deffalloie de ces choses ne je ne li miens ne d'acune d'ales je suis tenus de rendre et de restorer audit Jeham de Chalon et es suens touz les domaiges que il encourroient et auroient pour le deffaut se point an hi avoit et suis tenus de croire ledit Jeham et les suens et dou deffaut et des domaiges se il hi avenoient per lour soiremant et oblige assi mes hoirs à ceu faire et tenir En tesmoint de laquel chose j'ay mis mon seel en ces presantes lettres et hay requis à honorauble personne et discrete l'official de Besançon que il mete le seal de la court de Besançon en ces presantes lettres et à noble homme monsignour Phelippe de Vianne mon signour que il mete assi son seal en ces lettres auvec le mien seel Faites et données à Besançon le juedi après Penthecoste l'an Nostre Signour corrant par mil doux cenz octante et quatre