Charter Document - 02220162

Nous Vauchiers de Commerci sires de Chastelvilain faisons savoir à touz ces qui verront et orront ces presantes lattres que nous à parpetuel memoire avoir çay en avant de nostre bone et propre velonté pour bien et pour leaulté confessons et recognossons que nous tenons nous chastiaus c'est assavoir Monrevel et Chastelvilain rendables et jurables pour nous et pour nouz hoirs à toutjorsmais permaignablemant dou noble baron monsignour Jeham de Chalon signour d'Arlay nostre amey signour et neveu et confessons et recognossons que nous tenons en fié lige pour nous et pour noz hoirs à toutjoursmais permaignablemant doudit monsignour Jeham de Chalon signour d'Arlay toutes les choses ci après contenues et escriptes c'est assavoir Champaignole et le merchié et les foires doudit leu Escuvillon Woinon Saint Germain et ce que nostre peres avoit à Sise et es apartenances Le Pasquier Verz Lumuy Le Nam Sapoy et la garde de la grange d'Ardon et ce que nous avons es viles dou reverbois à Moutou à Latoy à Larderet le bois de Tarevant et les conquestes que nous avons fait en la terre et en la chastelenie de Monrevel et de Chastelvilain et es apartenances doudit leu Sirous Conte Gylley Gylleret Len Traffaye Cyam Syen l'abergemant desouz Chastelvilain Le Chaleme La Perroine L'Essart au Moinne le fort de Fontcenne Les Escrotenés Entremonz les jouz les bois les justices les laic les riveres les estanz Charbonel Charencé les appartenances et les fiez et les rierefiez de touz les lieus dessus nommez et des appartenances quamque nous avons et poons avoir conquester [et] edifié es chastiaux et es viles es territoires et es apartenances de touz les lieus dessusdiz en quelque meniere que ce soit et coment que il soit nommez et appelez sauz ce que nous avons à Nay et ceu que nous avons conquis à Sise de Jeham de Cossenay Et avons repris doudit monsignor Jeham de Chalon signour d'Arlay nostre amé signour et neveu en accressement de fié ligemant toutes les conquestes et les edifiz que nous avons fait et ferons ou porrons faire pour nous et pour nouz hoirs en noz chastel et en noz chastelenie de Monrevel et de Chastelvilain et es territoires et es appartenances desdiz chastiaux et de touz les lieus dessus devisez et escripz Et prometons pour nous et pour noz hoirs au devantdiz monsignour Jeham de Chalon signour d'Arlay nostre amé signour et neveu luy et à ses hoirs par nostre soiremant courporelmant doné sus saint evangile tenir fermemant et garantir permaignablemant toutes les choses dessus devisées et escriptes et en la forme et en la menieire dessusdite En tesmoint de ces choses nous avons mis nostre seel pendant em cestes presentes lettres et avons proié et requis à religious home et honeste Raoul abbé dou Laic de Carnens de l'ordre de Premonstré de la dyocese de Losanne et à noble et saige monsignour Henri signour de Jou que il metent leur seaux pendant en ces presantes lettres auvec le nostre Ce fut fait et donné l'an de l'incarnation Nostre Signour corrant par mil CC octante et siex l'uictive de saint Pere et saint Poul apostres