Charter Document - 02220161

Charter Document - 02220161


Charter Number: 02220161
Cartulary Title: Cartulaire de Hugues de Chalon (1220-1319)
Charter Language: Latin
Charter Origin: Religious
Charter Type(s): Confirmation
Date: 1301
Date type: Internal, A.D., Calendar
Resource Link(s): Patrimoine numérisé de Besançon - MS Droz 21 - Tome 1 (p329)

Charter:

Nos officialis curie Bisuntine sede vacante notum facimus universis presentes litteras inspecturis quod coram Stephano dicto de Foro et Guidone dicto de Ruppe clericis notariis et juratis curie nostre personaliter constitutus et in jure nobilis vir dominus Humbertus dominus de Claravalle in montana laude et consensu et voluntate Stephani domicelli filii sui presentis coram dictis juratis nostris confessus est et publice recognovit in jure quod mons qui dicitur Mons Sancti Saturnini super fluvium de Hayns cum appendiciis et pertinenciis dicti montis castrum fortalicium et edificium quod idem dominus Humbertus intendit ibi construere seu edificare cum villis terris et abergamentis feodis [et] retrofeodis totius parrochiatus Sancti Saturnini nec non et quicquid idem dominus Humbertus habet seu habere debet in guardia Boniloci sunt et esse debent de feodo ligio nobilis viri domini Johannis de Cabilone domini de Arlato et quod dictum dominum Johannem et suos heredes in dicto castro fortalicio et edificiis ipsius castri recipiet et receptabit contra quascumque personas quotienscumque et quandocumque dicto domino Johanni et heredibus suis placuerit et sibi videbitur expedire Item promisit et promittit dictus dominus Humbertus dicto domino Johanni pro se et suis sollempniter stipulanti ipsum dominum Johannem et ejus heredes recipere et receptare contra omnes excepto domino de Cusello in castro et fortalicio Clarevallis quod castrum seu fortalicium Clarevallis dictus dominus Humbertus confessus est in jure coram dictis juratis nostris esse et debere esse de retro feodo dicti [domini] Johannis Que omnia et singula supra scripta dictus dominus Humbertus pro se et suis heredibus et successoribus promisit et promittit per juramentum suum ad sancta Dei ewangelia corporaliter prestitum dicto domino Johanni et suis heredibus in perpetuum tenere et inviolabiliter observare et contra non venire nec contra venire volenti consentire modo aliquo et se nichil contra premissa fecisse vel facere in futurum quominus predicta omnia et singula robur obtineant perpetue firmitatis Volens idem dictus Humbertus et expresse consentiens quod nos ipsum et ejus heredes ad observationem omnium et singulorum premissorum per excommunicationis sententiam compellamus et compelli faciamus exceptione qualibet juris vel facti non obstante se et heredes suos quoad hoc jurisdictioni curie Bisuntine supponendo renuncians In quorum omnium et singulorum premissorum testimonium ad preces et requisitionem dicti domini Humberti et Stephani ejus filii nobis per dictos juratos nostros oblatas sigillum dicte curie Bisuntine presentibus litteris duximus apponendum Datum III kalendas octobris anno Domini MCCC primo