Charter Document - 02220158

Je Perriaus sires de Riveigney escuiers fiz çay en arriers Oudet signour de Ruvegney fais savoir à touz que je suis antrez en l'omaige et en la feauté de noble monsignour Jeham de Chalon signour d'Arlay et ay pris de lui en fié et en chasemant dou loux et dou consentemant et de la velonté Nichole ma fome en homes en censes en courvées en tailles em bois en champs em prez en amandes en signories et en toutes autres menieres que ceu soit pour cent livres de la menoie corrant à cest temps en la dyocese de Besançon à la valour de la monoie le roi de France que lidiz messires Jehans m'a doné et promis de paier ensi com il est contenus en unes autres lettres que je ay de luy seelées de son grant seal c'est assavoir sexante livres pour ledit fié et quarante livres que il m'a doné pour un chevaul Et est assavoir que lidiz messires Jehans mes bien amez sires ne puot ne doit avoir point de servitude ne de signorie sus ladite vile de Divrouse ne sus les choses devantdites sauz que lou fié tant soulemant Et cest homaige et feaulté et toutes les choses contenues en ces lettres je promet par mon soiremant doné corporelmant tenir et garder fermemant et loialmant audit Joham mon amé signour senz venir encontre ne consentir que autres i viegne Et je lidite Nichole fame doudit Perreal cest fié et cest homaige par ensi con il est diz dessus [ay] louez acceptez ratifiez et confermez et dou tout m'i consentez et promet par mon soiremant doné sus saint ewangile que je ne vendray encontre ne consentiray que autres hi viegne En tesmoint de laquel chose je lidiz Perrials et je Nichole sa fame avons prié et fait metre en ces lettres le seaul de la court de noble baron Renaut de Bourgoigne conte de Monbeliart nostre bien amey signour douquel l'on use à Lons Ce fut fait et doné le sambadi après l'assumption Nostre Dame l'an Nostre Signour corrant par mil CCC et cinc ou mois d'aost