Charter Document - 02220157

Je Huedes de Rens chevaliers fais savoir à touz que come mes très chiers et redotez peres mess Poinçars sires de Rens tient en fié et en chasemant le chastel de Popet les appartenances et les appendisses d'ixeli de noble baron saige et puissant mons Jeham de Chalon signour d'Arlay liquex chastiaux est venuz en ma main je willanz recognoistre bone foy en cest fait et en toutes autres conos et confesse que la vigne que l'on apele de Rens est et doit estre dou fié doudit baron mons de Chalon des appendises et des appartenances dou chastiaul de Poupet pour ce que dois or en avant mais ne doie rappeler en dotance que la vigne ne fut dou fié dou devantdit baron mon signour come appartenances ou appendisses dou devantdit chastiaul de Popet Et toutes les choses dessusdites je conois et confesse par mon soiremant estre veraies par ensi con dessus est diz et devisez Et est assavoir que ladite vigne siet en Rosset delez la vigne Nicholet de Bois d'une part et delez le biez qui depart Rosset et Royante d'autre part En tesmoint de laquel chose je ay mis mon seel en ces presantes lettres et ay prié et requis saiges persones et discretes le chapitre de Saint Anathoile de Salins que il lour seaux weillent metre auvec le mien en ces lettres en tesmoint de vertey Faites et données le vanredi après saint Nicholaux d'iver [l'an] MCCC et sept