Charter Document - 02220156

Je Estenes sires de Corlauour chevaliers fais savoir à touz ces qui verront ces lettres que [come] je tien en fié lige et en chasemant de noble baron et saige monsignour Phelippe de Vianne signour de Paigney mon très chier signour ma maison de Courlauour emsamble toutes les appendises de ladite maison et les Chevannes qui sunt entre Courlenz et Courlauour lesquex choses dessusdites sunt dou rierefié de noble baron monsignour Jehan de Chalon signour d'Arlay je dou lox et de l'auctorité doudit mon signour monsignour Phelippe ay mis et met ladite maison de Courlauour emsamble les appendisses et les Chevannes en la main doudit monsignour Jehan de Chalon signour d'Arlay mon amé signour et moi en deviste et ledit mon signour monsignour Jeham en enviste par ces presantes lettres tamque à sa bone merci et à sa bone velonté En tesmoint de laquel chose j'ay prié et requis ledit mon signour monsignour Phelippe que il mete son seal en ces lettres Et nous lidiz Phelippes liquex nous consentons es dessusdites choses et sunt faites de nostre velonté pour nous à la requeste doudit monsignour de Collauour avons mis nostre seal en ces lettres Et je lidiz Estenes sires de Collauour ay mis mon seel en ces lettres à plus grant fermetey de ceste chose et en tesmoint de verité Données le lundi après feste saint George l'am corrant par mil et trois cenz ou mois d'avril