Charter Document - 02220153

Je Chietars dit Lancerot d'Arlay fais savoir à touz ces qui verront et orront ces presantes lettres que je au jour que maistre Renaut de Noseroi chastelain d'Arlay me prit ou me fit prendre estoie et suis hons quittes mon signour monsignour Jeham de Chalon signor d'Arlay et que je estoie suens et suis encores ne non avoie autre signour que luy et je et toutes mes choses quelque part qu'eles fussent et soient senz reclamation de nul autre signour et ay promis je lidiz Lancerot pour moy et pour les miens et par mon soiremant doné sus saint ewangile estre à bien et à foi et loialmant dois or en avant à mon chier signour monsignour Jeham de Chalon signour d'Arlay come bons et loiaus hons quittes est et doit estre à son signour et promet pour moy et pour les miens à mon devantdit chier signour que je ne aurai signour ne feray autre signour que luy Et ces choses toutes emsamble et une chascune par soy j'ai promis à mondit chier signour maintenir et garder sanz corrumpre et nonmie venir encontre par mon soiremant dessus doné En tesmoignaige de laquel chose j'ay requis le seel de religiouse dame dame Mahaut de Bourgoigne abbasse de Chastel Challon et le seel Guillaume diens de Lons estre posez en ces lettres Faites en l'an mil CC octante et VII ou mois de mars