Charter Document - 02220150

Je Amiet d'Abbans escuiers fais savoir à touz que je conois et confesse moi tenir en fié et en chasemant de noble baron mon chier et redouté signour Jehan de Chalon signour d'Arlay mon chastel ou ma maison fort d'Abbans et especialment ceu que lidiz messires Jehans m'a baillié en eschange de ceu que je li ay baillié que je tenoie à Molumbe et toutes les autres choses et les appendisses que je tien et puis et doy tenir et avoir en la chastelenie d'Abban en quelque chose que ceu soit excepté ce que je tiens à Viler Saint George de mons Jeham de Chalon conte d'Aceurre et ceu que je tiens à Biens et à Four de Guillaume d'Arguel et de ces choses expressemant je suis ses hons liges En tesmoingnaige de ce je ay mis mon seal en ces lettres Données l'an mil CCC et sept le juedi devant Letare Jherusalem