Charter Document - 02220149

Nous officiaus de la court de Besançon faisons savoir que Jehanz diz de Ralans clers [et] Estevenins diz de Ralans ses freres demorant à Bleterans ont confessé et publiemant cogneu en droit per devant nostre comandemant lour avoir repris en fié et en chasemant pour lour et pour lour hoirs perpetualmant de noble baron et puissant monsignour Jeham de Chalon signour d'Arlay [pour luy et] pour ses hoirs les terres et les choses ci après escriptes c'est assavoir chascun de lour ensi come ci après est devis et ordenez Premierement lidiz Jehans de Ralans doues pieces de terre assises sur la rue Valaise et siet li une delez le chemin li autre siet delez la terre à l'abasse de Chastel Challon item une piece de terre qui siet ou leu où l'on dit Longues Pieces delez la terre Girart Dessus Les Autres item une autre piece de terre assise ou leu que l'on dit Champvoir joste la terre Garinat Quinart item doues pieces de prey assisses en la prairie de Larnay desquex l'une siet delez la terre mons Mathey de Saint Lathaint et li autre siet delez la terre l'abasse de Chastel Challon et la tient li Brunequins item esdiz prez de Larnay doues pieces et siet l'une delez la terre Vuideauble et Berther et li autre siet delez la terre es Riquaus item en la Vernée doues pieces et siet l'une delez la terre es anfanz Jeham Joffroy et li autre siet delez la terre à l'Abasse item es Longaines doues pieces de terre et siet l'une delez la terre à l'Abasse et li autre delez la terre es anfanz Jeham Joffroy et une piece assisse sus l'estant l'Abasse delez la terre ladite abbasse item doues pieces esquieles li estant audit Jeham de Ralans est fermez et siet l'une delez la terre Perrenat Losse et l'autre delez la terre Henri Michelet item une autre piece de terre où li maison Gauthier de Larnay est assisse et est delez la terre l'Abasse item une autre piece en laquel li maisons es anfanz Villaz est assisse et siet delez la terre Henri Michelet esquex pieces de terre cy dessus nommées il ai bien si come lidiz Jehans de Ralans l'affarme XX jornaux de terre que em prez que em champs que en cultis et n'i est pas contez li estant de Lernay et sunt assises les terres et les prez dessusdiz ou territoire de Bleterens et de Larnay Item ce sunt les choses que lidiz Estevenins de Ralans a pris doudit monsignour de Chalon c'est assavoir premieremant sa maison de bourc de Bleterens qui siet entre la maison es anfant à Boillet et le chasaul de ladite maison item la moitié de un meys assis à Blaterens la vile liquex mex est appelez li mex ez Thymonet qui part à terre de Vers et est taillaubles item les censes les courvées et les gelines que li mès ci après devisez li doivent c'est assavoir li mès es Torelet li mès es fiz Juiet le mès Willardet le mès Marion la Riche le mès es anfanz Andrier au Peletier le mès à la Rubiete le mès à la fame Rodet au Gerardet esquex mas dessus devisez li Ros de Vers prent la moitié de ladite servitude et lidiz Estevenins l'autre et tient l'on de lour per paiant à lour les courvées les censes et les gelines dessusdites Item ai repris en fié et en chasemant comme dessus lidiz Estevenins doudit monsignour de Chalon XVIII journaux de terre arauble es jornaux de Chenans assis es trois fins de Bleterens et en la riviere souz Nance item les diesmes que lidiz Estevenins prent en la moitié de ladite terre item doues soitures de prez assises en la praierie de Bleterens Item ce sunt les choses que li devantdit Hugues Michelet ai repris en fié doudit monsignour de Chalon c'est assavoir V soiturres de prey assises em prey Belin delez le prey es Goissenat item une grant pose à cheval assise en l'Assart que li Rosselet gaignent item une coste assise en Saignois et part de Oudet de Vers item une autre chose assise vers les Forches qui part à Estevenin de Ralans item une autre coste qui part à Oudet de Vers et siet vers l'Abespin item une autre coste assise delez le champ au fil Sarron et part à Oudet de Vers Some de ceu que lidiz Hugues reprent en fié doudit mons de Chalon cinc soiturres de prés et de terre arauble trois jornaux à cheval Et de ces choses dessusdites et pour iceles li devantdiz Jeham de Raulans Estevenins et Huguenins pour lour et pour lours hoirs sont antrez en l'omaige et en la foy dou devantdit monsignour pour lui et pour ses hoirs en tel meniere et en tel condition que pour ce li devantdit Jehans Estevenins et Huguenins et lour hoirs doivent estre franc et quitte de toutes choses et de touz autres servitutes ensi come li autre gentilhome de Bleterens sont et les doit maintenir lidiz messires d'Arlay et sui hoirs lour et lour hoirs en la forme et en la maniere de ses autres gentilshonmes de Bleterens par ensi come li devantdit Jehans de Ralans Estevenins et Huguenins hont affermey per devant nostredit comandemant Et toutes ces choses dessusdites et devisées li devantdiz Jehans de Ralans Estevenins et Huguenins ont confessé et publiement recogneu per devant nostredit commandemant estre veraies et les ont promis pour lours et pour lours hoirs per lour soirement donné corporalment sus saint ewangiles et per solempne stipulacion tenir et garder fermement et qu'il ne venront encontre per lour ne per autrui taisiblement ne en apart et ont renuncey En tesmoingnaige de laquel chose à la requeste des devantdiz Jehans de Ralans et Huguenin et Estevenin faites à nos par ledit notaire juré de nostre court avons mis en ces presantes lettres le seaul de la court de Besançon Faites et données le juedi devant la feste de la invencion de saint Estene l'an Nostre Signour corrant par mil trois cenz et dix