Charter Document - 02220145

Nous Merguerite de Belevevre fame çay en arriers mons Wauchier de Commercy signour de Monrevel faisons savoir à touz presanz et à venir que nous tenons en fié liegemant et avons tenu sept anz devant la mort de nostredit mari et plus per le comandemant de luy nostredit mari de noble baron mon chier signour monsignour Jeham de Chalon signour d'Arlay le chastel de Monrivel et la vile de Champaignole et les apertenances doudit chastel et de ladite vile quel qu'eles soient et comant qu'eles soient appelées lequel dit chastel et ladite vile et les appartenances desdiz leus nostres devantdit mariz mess Vachier nous avoit donné baillié et delivré permaignablement à toutjours en recompensation de nostre mariaige et de nostre douaire que il avoit eu et receu pour nous et en estions par nostredit [mari] en pasible possession Et ces choses nous disons et affermons per nostre soiremant donné corporalmant estre veraies en la presance de noble home mons Pierre signour de Boncort chastelain de Bracon mons Guy de Champaigne chevalier mons Estene prestre de Champaignole Estiene Chambier dit Morel de Salins Odon de Thoraise escuier Bertholomet d'Arbois clerc notaire de la court de Besençon lesquex dessusdiz nous avons appelez en tesmoint de ce Et avons prié et requis honoraubles persones le chapitre de Saint Anathoile de Salins que il lour seaux de lour chapitre metent en ces presantes lettres Faites et données l'an que li miliaires Nostre Signour corroit per mil trois cenz et VIII le sambadi devant feste de Touz Sainz