Charter Document - 02220144
Charter Number: | 02220144 |
---|---|
Cartulary Title: | Cartulaire de Hugues de Chalon (1220-1319) |
Charter Language: | French |
Charter Origin: | Lay |
Charter Type(s): | Confirmation |
Date: | 1300 |
Date type: | Internal |
Resource Link(s): |
Patrimoine numérisé de Besançon - MS Droz 21 - Tome 1 (p286) |
Charter:
Je Guillermes de Saubertier escuiers fais savoir à touz ces qui verront et orront ces presantes lettres que j'ay pris de fié de noble baron monsignour Jeham de Chalon signour d'Arlay mon très bien amé et redouté signour et tien de fié de luy pour biensfait que il m'a fait et que je ay heu je et les miens de luy et d'autre part pour sexante livres de menoie currant communemant per l'arceveschié de Besançon lesquex j'ay eues et receues de mondit redouté signour de cest fait en bons deniers nombrez et don je me suis tenuz pour bien paiez et hay pris de luy de fié si com dessus est dit toutes ces choses nommées ci en ces lettres c'est assavoir le meys Drusson item le mès à l'Escuier item le mès Baraint item le mès Mengin emsamble toutes les apartenances de cesdiz mès et sient ou perrochaige de Boujant cizdiz mès item le mès encores où Renaut Bergiers demore item le mès Perruisel Cornu item le mès à Bon Porchier emsamble lour apartenances et sient cizdiz mès ou parrochaige de Saint Germain item la vigne d'Ormoy qui siet ou territoire de Breiny item le mès à la donzele des Chaignes qui siet ou parrochaige de Bojanz et es apertenances item les choses que Jaquaz li Ratiers tient de moy et sient entre Vincele et Saint Eusege item les Varrenes que Humbers li Rataz tient assi de moy ou perrochaige de Montaigney d'autre part de la rivere item le tiers dou diesme de Bojanz que Moutons de Satoy [tient] de moy Et ces choses toutes je tien de fié de mondit bien amé et redouté signour et les ay prises de luy de fié pour les raisons dessusdites et promet je lidiz Guillermes per mon soiremant doné corporament sus saint ewangiles pour moy et pour mes hoirs cedit fié et toutes les choses de celuy garder et maintenir bien et loialmant dois or en avant et nonmie aler encontre par moy ne par autrui en nulle meniere En tesmongnaige de laquel chose je lidiz Guillermes de Saubertier ay mis mon seel en ces presantes lattres en tesmoignaige de verité Faites et données [à] Arlay l'an corrant per mil CC nonante et IX ou mois de jenvier