Charter Document - 02220143

Je Jehans de Chardenous escuiers fiz çay en arriers mons Guillaume dou Faiz chevaliers fais savoir à touz ces qui verront et orront ces presantes lettres que je suis devenuz hons à noble baron monsignour Jeham de Chalon signour d'Arlay mon bien amey signour et suis antrez en son homaige par mes mains et par ma boche en la meniere qu'il est acostumez que gentishons antre en l'omaige de signour sauve la feauté de Henri de Sainte Croiz mon premier signour Et cest homaige je ay fait audit mons Jeham de Chalon signour d'Arlay pour le pris de quarante livres de petit tournois lesquex je ay eues doudit monsignour Jeham en bons deniers bien nombrez et convertiz en mon profit Et per cest homaige façant et per lesdites XL livres dessusdites je ay promis et promet audit monsignour Jeham come à mon signour en bone foy et per mon soirement doné et tochié sus saint ewangile corporelmant que je bien montez et bien armez li aideray bien et loialmant de la guerre que il a ou aura encontre le excellent prince monsignour Philippe roy de France lui et ses genz et ses aidanz et Robert duc de Bourgoingne lui et ses genz et ses aidans et vendray à mandemant doudit monsignour Jeham de Chalon signour d'Arlay per tantes foies com je an sarai requis per lui ou per ses lattres pour ce que je soie en estat que li cors le puisse soffrir Et est assavoir si je perdoie en son servise acuns de mes chevax il les me doit rendre et restorer à l'agart de bones genz et de chevaliers assi com est acostumé de faire tel chose entre genz d'armes En tesmoignaige de laquel chose je ai baillié ces lettres audit mons Jeham de Chalon signour d'Arlay seelées de mon seal ensamble les seaux de religious home et honeste frere Humbert humile priour [et Humbert curé] de L'Estoile esquex je ay requis que il y metent lour seaux en ces lettres en tesmoignaige de verité Ce fut fait et doné le dimenche après l'exaltation Sainte Croiz l'an Nostre Signour mil CC nonante et VII ou mois de septambre