Charter Document - 02220142
| Charter Number: | 02220142 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Mandate |
| Date: | 1304 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 21 - Tome 1 (p281) |
Charter:
Renaut de Bourgoigne cuens de Mombeliard à ses bien amés Jeham d'Andelost damiseaux le priour de Bonleu Richart de Montsajon monsignour Jeham de Frontenay chevalier Guillerme Le Ferroillat demiseaux Jehanz fiz Bertrant de Bornay salut et veraie amour Nous vous prions mandons et comandons si acertes com nous plus poons à toi Jeham d'Andelost que tu de ce que [tu] tiens de nous en la signorie de Criley de part ta fame dou tout et des apartenances à vous priour de Bonleu de tout le droit [et] la raison que nous avions en la garde de la maison de Bonleu et es apartenances dois la riviere d'Ains envers la Jou à toy Richart de Monsajon de quamque tu tien de nous à Chamblay et à Marregney et es apartenances de ces lieus à vous messire Jeham de Frontenay de la fort maison que vous tenés en ladite ville à toi Guillaume Ferroillet de tout quanque tu tiens à Frontenay et ou territoire de nous en quelque meniere que ceu soit et toy Jeham fil Bertrant de Bornay de tout quamque tu tiens de nous ou territoire de l'Estoile entrez en l'omaige et en la foy de nostre chier oncle monsignour Jeham de Chalon signour d'Arlay en tel meniere con vous en estoiez en nostre homaige et en nostre foy et en obeissiez à luy en la maniere que vous an estiez tenuz à nous senz plus attendre autre comandement de nous Et pour ce que vous soiez plus tenuz à faire ceste chose nous avons sealé ces lettres à nostre seaul pendant Faites et données à Lon le Saunier le lundi après l'uictaive de la resurrection Nostre Signour l'an mil trois cenz et quatre ou mois d'avril