Charter Document - 02220141

Je Jocerant de Crevecuer escuiers fais savoir à touz ces qui verront ces presantes lettres que je em recompensacion de sexante livres d'estevenens lesquex li nobles bers messires Jehans de Chalon sires d'Arlay mes bien amés sires et redoté a doné à moy et baillié en bons deniers nombrez et de iceles me tien por paiez j'ay pris en fié et en chasemant doudit mons Jeham mon redoté signour toutes les choses les possessions et les rentes lesquex je ay et puis ou doy avoir à Condamine em hommes taillaubles et exploitables et diex souz de menoie corrant de cens lesquex Bernarz diz Puz de Comdamine me doit chescun an censamant à feste saint Mertin d'iver dou mès de terre que il tien de moi en la ville et ou terraige de Condamine et la tierce partie que je ay et perçoive et doy percevoir chescun an ou diesme de gros blez et de menuz dou terraige doudit leu de Condamine et quanque je ay et puis ou doy avoir et reclamer oudit leu de Comdamine sauz persones de homes frans Et de ces choses devantdites je suis antrez en l'omaige doudit mons Jeham de main et de bouche et li ay promis feauté tenir selon ce que raisons de droit requiert et aporte En tesmoignaige de laquel chose je lidiz Joceranz ay proié et [fait] metre en ces lettres les seauls des cours de nobles barons mons Renaut de Bourgoigne conte de Mombeliart et mons Hugue de Vianne signour de Lonvy et de Pymont desquex l'on use à Lons lesquex seaux je ay pour attentiques en ceste partie Ce fut fait et doné le lundy pruchain devant feste saint George en l'am de Nostre Signour corrant per mil doux cenz nonante et cinc ou mois d'avril