Charter Document - 02220139
| Charter Number: | 02220139 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1290 |
| Date type: | Internal, A.D. |
| Resource Link(s): |
Patrimoine numérisé de Besançon - MS Droz 21 - Tome 1 (p.271) |
Charter:
Universis presentes litteras inspecturis et audituris ego Richardus de Chamrogeroux domicellus notum facio quod ego considerans et attendens curialitates et beneficia nobilis viri domini Johannis de Cabilone domini de Arlato militis domini mei michi ab ipso Johanne impensas et impensa et que idem dominus Johannes de die in diem michi et meis impendere nititur et bona que michi et meis de consilio et auxilio ipsius provenerunt volens et cupiens quamplurimum eidem domino Johanni tanquam domino meo deservire accepi in feodum et casamentum a dicto domino Johanne medietatem omnium rerum quas habeo vel habere possum et debeo ratione qualibet in villa de Charmey de parochiatu de Mervans Cabilonensis dyocesis et in toto finagio pertinenciis et appendiciis dicte ville scilicet a magno itinere per quod itur de Faia versus Mervans usque ad riveriam de la Guiete et a rivo qui dicitur li biez dou Charme usque ad alium rivum qui dicitur li biez de fonte de Charmoy qui quidem rivi durant et defluunt a dicto magno itinere usque ad dictam riveriam de la Guiete que medietas rerum predictarum extimatur ad centum solidatas stephanensium et que predicta erant de proprio meo allodio absque aliquo alio onere feodi vel retrofeodi Pro qua medietate dictarum rerum quam ego et heredes mei tenebimus de cetero a dicto domino Johanne et suis heredibus in feodum et perpetuum casamentum teneor ego predictus Richardus et promitto pro me et meis heredibus per juramentum meum super sancta Dei evangelia corporaliter prestitum dicto domino Johanni tanquam domino meo feodali tanquam bonus vassallus bene et fideliter deservire et de predictis in homagium et fidelitatem dicti domini Johannis domini mei me confiteor jam intrasse Renuncio In cujus rei testimonium sigillum curie Cabilonensis presentibus litteris rogavi et optavi apponi Datum anno Domini millesimo ducentesimo nonagesimo mense novembris