Charter Document - 02220136

Je Bique dame de Jour et je Henri de Jou chevaliers et je Jehans de Jouz escuiers freres à ladite Luque faisons savoir à touz ces qui verront ces presantes lettres que nous à la noble dame Lore contesse de Bourgoigne et dame de Salins avons mis en gaige et baillié en non de gagerie nostre fié de Husies pour II livres lesquex nous avons receu et heu de ladite contesse en bons deniers nombrez et avons abrenoncey en cest fait à l'exception de peccune nonmie nombrée et nonmie heue Et est assavoir que nous avons mis cestedite gagiere en la main de ladite contesse par le loux et par le consentement dou noble baron Jeham conte de Bourgoigne et signour de Salins son mari de cui fié ladite gagiere est et de cui nous la tenons en fié et ladite gagiere promettons en bone foy garantir à ladite contesse en droit contre touz En tesmoignaige de laquel chose mis avons nous seaux pendans en ces lettres Ce fut fait l'an de grace qui corroit per mil CC sexante et siex ou mois de juignet