Charter Document - 02220135

Je Wauchier sires d'Andelot fais savoir à touz ces qui verront ces lettres que j'ay repris dou noble home Jeham de Chalon signour d'Arlay mon signour en accressement dou fié permaignauble le siexte de la demoine sauz les rentes que l'on doit et cinquante celours de montée lesquex choses je ay ou puis de Salins dou bourc le conte de Bourgoigne Et ay encour repris doudit Jeham ensi comme dessus est devis le siexte des hommes de Chays le fié mons Hugue Noise de Salins le fié Wienet au fil Danserven le fié mons Willaume La Rate prevoire de Salins le fié monsignour Colin Petit Cousin et quatre emines et demi fromant de rente ou petit molinet de Malpertuis et trois quartiers de bacon que j'ay [de] rente à Salins qui sont à paier chascun an à Pasques et quamque j'ay à Salins et ou territoire de Salins sauz la vigne de la Chaux de la Pine et le truil qui est entre le chemin et la riviere que je tien dou noble baron Jeham conte d'Aceurre et signour de Rochefort Et le fié dessusdit promet je par ma foy corporelmant donnée garantir contre toutes genz audit Jeham signor d'Arlay mon signour et à ses hoirs et en oblige moi et mes hoirs dou garantir En tesmoingnaige de ceste chose j'ay mis mon seel pendant en ces lettres Faites et données la veille de la feste de Touz Sainz l'an de grace qui corroit par mil CC octante et VII