Charter Document - 02220124

Je Jehans de Ceys chevaliers fais savoir à touz ces qui verront et orront ces presantes lettres que je suis antrez en l'omaige dou noble baron mons Jeham de Chalon signour d'Arlay et ay pris de luy en fié et en chasemant quanque j'ay à Deserviler et es appartenances em hommes em prez en chesaux en justices et en toutes autres choses en quelque meniere que je les i aie puisse ne doie avoir sauve la feauté mons l'arcevesque de Besançon et mons Symon de Mombeliart signour de Montron Et lidiz messires Jehans m'a donné la sue quarte partie de la grant d'Amancey et cele quarte partie je reconois que je la tien de fié doudit mons Jeham emsamble les autres choses dessusdites En tesmoignaige de laquel chose j'ay prié et requis honorauble baron et saige l'official de la court de Besançon qu'il mete le seel de ladite court de Besançon en ces presantes lettres Faites et données le vanredi après l'ascension Nostre Signour l'an de grace mil CC quatre vinz et siex