Charter Document - 02220120

Nous officiaus de la court de Besançon faisons savoir à touz ces qui verront et orront ces presantes lettres que come Jeham de Chalon sires d'Arlay eust ajorné par devant luy à Besançon Willemenat signour d'Abbens son homme au jour de mecredi après feste saint Paincray pour ce que lidiz Willemenet li coneut le fié qu'il tient de luy ensi come il conurent par devant nous en la presance doudit Jeham lidiz Willemenat estaubliz por ce especialmant venant en droit ledit jour [en sa presence] et em la nostre qui estiens illuc appelez pour oir et pour tesmoignier audit Jeham la coneue que lidiz Willemenat voudroit faire come publique persone et juges ordenaires en l'iglise des Freres Praachours conut lidiz Willemenat qu'il tenoit doudit Jeham tout le chastel d'Abbens ligemant et la tourt doudit chastel rendauble Laquel conue faite lesdites parties nous requistrent come publique persone et juge ordenaire si come il est dessus diz que nous tesmoignassiens toutes ces choses dessusdites et en feussiens faire lettre seelées dou seal de la court de Besançon Et nous à la requeste doudit Jehan et Willemenet sus lesdites choses avons faite ces presantes lettres et y avons fait mettre en tesmoingnage de verité le seel de la court de Besançon Ce fut fait le jour dessusdit l'an Nostre Signour corrant par mil CC sexante et dix et ouit