Charter Document - 02220117

Je Adeline fome çay en arriers Hugon chastelain de Chalemont et je Willat fil doudit Hugon et de ladite Adeline façons savoir à touz ces qui ces presantes lettres verront que nous avons reconeu et savons de voir que nous tenons dou fié de noble baron Jeham conte de Bourgoigne et signour de Salins nostre signour et dou fié la contesse Lore nostre dame fome doudit conte La Riviere et ceu que nous avons em Boujaille et ce que nous avons en Air et nostre grant maison de pierre de Salins et les doux chesaux qui tochent à ladite maison de l'une partie et de l'autre et dix livrées de terre en la rente de la saunerie de Salins que l'on nos doit chascun an à la saint Andrey et la siexte partie de demi buillon en la rente es Narduel et une vigne qui siet à Salins ou territoire d'Andelost et la franchise d'une montée de muire ou puis de Lons et les vignes de Lons que nous achetames par le comandemant monsignour le conte En tesmoignaige de laquel chose nous li chapitres de Saint Anathoile de Salins à la priere de ladite Adeline et doudit Vuillat avons mis nostre seel pendant en ces presantes lettres Ce fut fait le vanredi après l'Apparicion l'an de l'incarnation Nostre Signour qui corroit per mil CC sexante et cinc