Charter Document - 02220115

Je Estenes de Bannens chevaliers fil çay en arriers mons Haymon doudit leu fais savoir à touz ces qui verront ces presantes lettres que je ay pris et pren en fié et en chasemant ligement sauve la feauté au signour de Husies de [la noble dame] Lore contesse de Bourgoigne et dame de Salins et des suens ce que je ay à Bovenens les enfant Robert au fil Bienfaitant c'est assavoir Hyemonet Maignier à Perrenet et lour mex emsamble lour appendisses et dix huit amenes de blez que je ay chescun an de rente ou molin de la Riviere c'on dit de Montenier et le quart dou molin de Bannens qui me vaut chascun an trois quartaus de blez liquex molins est apelez le molins Nuef es chevaliers de Bannens Et ay promis et promet à la devantdite [dame] Lore que je la serviray li et les suens come gentishons doit servir son signour et li promet toutes ces choses dessus nommées à garantir contre toutes genz et en touz leus En tesmoignaige de ces choses je ay fait metre es presantes letres le seal l'abbé dou Mont Sainte Marie Ce fut fait l'an que l'incarnation Nostre Signor corroit per mil CC sexante et cinc ou mois de marz