Charter Document - 02220113

Je Perrins fil çay en arrier mons Perron Maire de Besançon fais savoir à touz ces qui verront et orront ces presantes lettres que je tien en fié lige et en chasemant dou noble baron mons Jeham de Chalon signour d'Alay mon amé signour ma maison de Nanz qui est apelée Montruchar et recognois et dy en verité que je oudit leu de Montruchar ne puis faire tour creniaux ne forteresces ne avant pic que celuy qui est oudit leu si ce n'est par la volunté et per lo comandemant de mon devantdit amé signour fuer que tant que les edifices qui sont oudit leu je puis restorer et mantenir em piez sanz faire autre forteresce que estre i soloit ne plus aut je ne puis eslever les murs et la cloison de ladite maison se ce n'est de sa velonté expresse laquel maison de Montruchart je tiem en fié lige de mons Jeham ensi com dessus est diz emsamble les appendises et les apartenances de ladite maison et toutes les choses que j'ay puis et doi avoir en la vile de Nam ou territoire et es appendisses de ladite vile Et toutes ces choses dessusdites je promet par mon soiremant doné sus saint ewangile corporelmant tenir et garder sanz venir encontre per moy et per autruy En tesmoingnaige de laquel chose j'ay requis et fait metre le seel dou chapitre de Saint Anathoile de Salins en ces presantes lettres Faites et données ou mois de marz l'an mil CCIIIxx et IX