Charter Document - 02220110

Je Humbers de Clerevaux fil noble baron Ponçon signour de Cleresvaux fais savoir à touz ces qui verront ces presantes lettres que par la volunté et le comandemant mondit pere ay pris en fié lige la vile de Patronay et les appendisses de la noble dame Lore fame çay en arrier le noble baron Jeham conte de Bourgoigne et signour de Salins et doudit fié suis antrez en son homage lige sauve l'eschoite de heritaige de fié lige s'ale m'avenoit Et est assavoir que se aucuns demandoit riens oudit fié à ladite dame je lidiz Humbers et lidiz Poinz ses peres prometons à ladite dame per noz soiremanz donné corporelmant sus saint ewangile deffandre et garantir ledit fié à ladite dame et à ses hoirs contre toutes genz à droit En tesmoignaige de laquel chose je lidiz Poinz ay mis mon seel en ces presantes lettres à la requeste doudit Humber mon fil et li religious hons priours de Bonleu de l'ordre de la Chartresse son seel en ces lettres à ma requeste et à la requeste doudit Humber mon fil en plus grant tesmoignaige de verité Ce fut fait l'an Nostre Signour mil CC septante et sept le dimenche devant la saint Gregoire