Charter Document - 02220109

Je Pierres dit Galafins de Poloigney chevaliers fais savoir à touz ces qui verront et orront ces presantes lettres que j'ay pris en fié dou noble baron Jeham de Chalon signour d'Arlay une moie piece de vigne assisse ou territoire de Bivilley ou leu que l'on dit en Sarre et la place et les autres fiez et les partaiges liquex vigne siet delez la vigne mons Haymon chastelain de Monront d'une part et delez la vigne Ogier dit Entre de Bivilley d'autre part et en ay fait homaige et feauté au devantdit noble baron monsignour Jeham de Chalon sauve la feauté de mes signours c'est assavoir dou Chastelenat de mons Odon Le Grant de Poloigney chevalier et des hoirs mons Haymon dit Juene Et pour ce que je suis antrez en l'omaige doudit noble baron il m'a donné XV livres de bons estevenans lesquex j'ay eues et receues de luy et bien m'an suis tenuz appaiez En tesmoignaige de laquel chose je lidiz Pierres ay requis et fait metre en ces lattres le seel de la court dou noble baron et puissant le conte de Bourgoigne duquel l'on use à Poloigney Faites et données en l'an de l'incarnation Nostre Signour Jhesu Crist corrant per mil CC octante et cinc ou mois de decembre