Charter Document - 02220108

Je Richars de Mombeliart sires de Ceys fais savoir à touz ces qui verront et orront ces presantes lattres que de tel fié don je suis hons à noble baron Jeham conte de Bourgoigne et signour de Salins c'est assavoir de la poesté de Fertens de ma maison de Mommaour et [de] mon homme le Megies d'Abonne par la volunté et par le comandemant doudit conte suis antrez en l'omaige de [la noble dame] Lore contesse de Bourgoigne et dame de Salins sa fame en tel maniere que ledit fié doy desservir doudit conte à sa vie et après torne à ladite contesse et à ses hoirs per sa droite partie Et ay quité et quite à ladite contesse et à ses hoirs tel droit et tel raison come je avoie et devoie et pooie avoir ne reclamer ou puy de Mommaour sauz ma maison que je ay à Mommaour que je tien de ladite contesse Et en tesmoignaige de ce à ma priere et à ma requeste li abbes de Goille et li chapitres de Saint Anathoile de Salins ont mis lour seaux pendant en ces lettres Ce fust fait le sambadi après la purification Nostre Dame l'an Nostre Signour qui corroit per mil CC et cinquante et nuef