Charter Document - 02220107

Je Jehans diz de Ceys çay en arriers fil mons Perron dit de Ceys faiz savoir à touz ces qui verront ces presantes lettres que je suis antrez em l'omaige à la noble dame Lore fame çay en arriers dou noble baron Jeham comte de Bourgoigne et signour de Salins sauve la feauté des hoirs mons Estene de Ceys qui fut mes freres et ay pris en fié et en chasemant de la devantdite dame un quartier et demy de muyre en la chaderette de Salins franc et quite sauves les costumes de ladite chaderete que tuit li autres quartiers doivent Et se ensi estoit que je ledit quartier et demy ne poisse afranchir d'acune amone que l'on doit à ces de Lossanne je weil et outroi que uns autres quartiers qui me demore en ladite chaderete soit chargiez dou paier tout ce que lidiz quartiers et demi davroit sauves les costumes devantdites et ledit quartier qui me demore an oblige et ay obligié en la main de ladite noble dame pour aquiter et affranchir ledit quartier que de luy ay pris con dessus est devisé et ay promis et promet per ma foy corporelmant donnée à la devantdite dame affranchir et garantir contre toutes genz ledit quartier et demi En tesmoignaige de ceste chose je ay fait seeler ceste lettre dou seal dou chapitre de Saint Michiel de Salins Ce fut fait l'an Nostre Signour qui corroit per mil CC et sexante et VIII anz ou mois de novembre