Charter Document - 02220106

Je Jehans de Ceys chevalier à ce temps bailliz dou noble baron mons Jeham de Chalon signour d'Arlay fais savoir à tous que je tien et recognosse tenir en fié ligement de mon amé signour mons Jeham de Chalon signour d'Arlay par raison des fiez de Saint Agne que je lidiz Jehanz [tien] des signours de Rens desquex signours de Rens je lidiz Jehans de Ceys tenoie ledit fié liquel fié est de l'iritaige Yolent ma fame c'est assavoir es bois de Jarraise les trois parties dou leu que l'on apele coste Frelmont atochant d'une part es bois communaux de Cernens et d'autre part à la coste dou Poiz liquex pieces de terre est assise entre douz ruisseaux qui s'ajostent oudit Poiz et corrent de çay et de lay tanque au chemin qui s'an va à Saint Agne sus Vauz et à Cernens les enfanz Perrin Reschon emsamble lour meix le fil à Donzel ensamble son mex les anfanz au Voirre emsamble lour mex les anfanz Bertholemey emsamble lour mex les anfanz Jaquemet et Hugon son frere ensamble lour mex Jehannim de La Loche le fié Jannim de Cernens Et en recognossance de ces choses dessusdites je lidiz Jehannins de Ceys chevaliers ay mis mon seel pendant en ces presantes lattres Faites et données l'an Nostre Signour qui corroit per mil CC octante et VIII le juedi après Toz Sainz