Charter Document - 02220105

Je sires Humbers de Fraigne chevalier fais savoir à touz ces qui verront et orront ces presantes lettres que je suis devenuz hons liges et weil estre à noble dame Lore fome çay en arriers le noble baron Jeham çay en arriers conte de Bourgoigne et signour de Salins sauve la feauté au signour de Husies et ay repris en fié et en chasemant pour moy et pour les miens de la devantdite dame Lore sexante soudées de terre c'est assavoir XX jornaux de terre arauble assis ou territoire de Fraigne desquex XX jornaux cinc jornaux sont assis en Champallier qui est assis d'une part delez la vile de Fraigne derrier la maison Estene dit Chevalet et d'autre part delez la piece es Maruglier et cinc jornaux ou cham de Ruivel qui est assis delez le cham mons Henri curié de Fraigne et quatre jornaux ou cham de Laites qui est assis d'une part delez le cham es fiz Chavier et d'autre part delez le cham mons Wachier chevalier de Fraigne et un jornal ou cham de Ruivel qui est assis d'une part delez le cham es Borrias et d'autre part delez le tertre de Monmoret et un jornal ou cham de la fin de Crusille qui est assis d'une part delez le cham Estene dit Chevalet et d'autre part delez le cham Robelin de Fraigne et un jornal ou cham qui est assis d'une part [delez] le cham Ponce fame çay en arriers Chanet et d'autre part delez le cham Huguenim fil Pasqua de Livier et trois jornaux ou cham de Ruivel qui est assis d'une part delez le cham mons Henri curé de Fraigne et d'autre part delez le cham mons Vauchier pour vint livres d'estevenans lesquex la devantdite dame Lore m'a donées et je les ai receues de li en bonne menoie nombrée et m'an tien bien por paiez En tesmoignaige de laquel chose je devantdit sires Humbert de Fraigne chevalier ay fait seeler ces presantes lettres dou seel à religious baron frere Jaque abbé dou Mont Sainte Marie de l'ordre de Citiaux de la dyocese de Besançon et dou seel mons Pierre dit Esperit chevalier de Salins bailliz à la devantdite dame Lore contesse de Chalon Ce fut fait et doné l'an dou miliaire qui corroit par mil CC septante et quatre ou mois de jung