Charter Document - 02220102

Je Humbers dou Vernoy diz d'Arboys bailliz de Bourgoigne fais savoir à touz ces qui verront et orront ces presantes lettres que je tien en fié dou noble baron Jeham de Chalon signour d'Arlay les choses que ci après sont escriptes c'est assavoir ou territoire de Bivilley à Noirefouchier trois jornaux de terre dever le chemin un jornal et demi es Estoippe trois jornaux ou Preal dous jornaux desoz le chemin d'Arbois siex jornaux et desouz ledit chemin enqui maismemant trois jornax item à Pepelin doues maisgnies de hommes c'est assavoir le mex Blondial et le mex es anfanz Huguenim au Celerier item sus Roche siex jornaux de terre item en cest meisme leu un jornal et ou Palencheour trois jornaux Et se ce estoit que ces choses dessusdites ne valissent dix livrées de terre chascun an je lidiz Humbers m'oblige en la main audit Jeham d'en faire valoir lesdites dix livrées de terre et de ce suis ses hons et antrez en son homaige En tesmoignaige de laquel chose je lidis Humbers ay requis à discretes personnes à chapitre de l'iglise de Saint Anathoile de Salins que il metent leur seaux pendant en ces presantes lettres en tesmoignaige de verité Faites et données l'an Nostre Signour coirrant per mil CC octante et VII le sambadi après la feste saint Martin d'iver