Charter Document - 02220100

Je Fremont dit d'Alaise chevaliers fais savoir à touz ces qui verront ces lattres que je suis antrez en l'omaige de la noble dame Lore contesse fame çay en arriers le noble baron Jeham conte de Bourgoigne et signour de Salins sauve la feauté de mes signours que devant li avoie et ay pris de li en fié doues vignes que ou territoire de Salins ay don l'une est ou costel de Saint Ferel assise selonc la vigne qui fut mons Guillaume de Laier et l'autre ou costel de Beloinne qui est apelée la vigne de Chamvire assise desouz la vigne Huguenin dit Riche Et weil et outroi que se je n'ay que un hoir à terre tenir que per ensi com je suis antrez en l'omage à ladite contesse per ensi hi entroit en l'omaige de ses hoirs et se plus de va che n'ay à terre tenant cil qui lidit fié tenra entroit en l'omaige de ladite contesse ou de ses hoirs devant toutes genz sauve la feauté le signour de Ceys En tesmoignaige de ceste chose pour ce que seel n'avoie j'ay prié le chapitre de Saint Michiel de Salins que lour seel meissent en ces lettres Ce fut fait le vanredi après la feste sainte Lucie l'an Nostre Signour qui corroit per mil CC sexante et dix